Va današnje vreme kada se granice pomalo ukidaju, a do malo vremena ćemo i pozabit kako smo se užali trest dokla su nas cariniki maltretirali za malo špeži i kakovi postoli, teško je i zamislet da je i okol Matuj pasevala granica. I to ne bilo kakova. Jako čuvana i nadzirana granica mej Kraljevinu Italiju i Kraljevinu SHS. Takozvana Rapalska granica. Granica ka je na umjetan način podelila Kastavfšćinu, judi i umejki, a čigove posljedice su se, moremo reć i do pred malo ćutile. Danaska je to više zafrkancija kada mi z zapadnega dela Kastavšćini zovemo ovi z istočnega dela Jugoslaveni, a jedan moj kastafski prijatel je najveseleji kad mi se more narugat da će prit h Matujan va „Romu na đelato“. To, kot da bi da smo malo manji Hrvati leh oni. A streje generacije se i pamete da su se rada i potukli, na matafuni, to se zna, ti „Talijani“ i „Jugoslaveni“, a pogotovo ako je kakova malica imela simpatiju na drugoj strane.
Na sreću te granice već čuda let ni. Ostala je još samo va nečigoveh glavah. I boje da je ni, ma stvari od starini trebe zapisat bile lepe, ale pak grde da mlaji znaju kade bivaju i da ni vavek teklo med i mleko. Od granice su danaska ostali lih granični kamiki, kakova stražarnica i neč bodijate žice. Danska kada pul njih pasujemo teško da ćemo ih nanke abadat, a sigurno ni zamislet ne moremo kakove nevoji su naši stari imeli kad su morali pasevat kroz kontroli onuda kuda se je odvevek slobodno hodilo.
Povijest ove granice formirane 1920. leta seže par let nazad va 1915. leto kada je tijekom 1. Svjetskega rata Italija pasala na stranu Antanti i prema Londonskemu sporazumu ki je potpisan 26.4.1915. Italije je obećana cela Istra i del Dalmacija. Kada je rat finil, a Austro-ugarska pod ku smo do onda potpadali se je raspala, Italija je dobila del Istri, ali ne i Reku, ka je još vavek imela nedefiniran status i ka je va to vreme, slobodno moremo reć, bila va središte svetskeh političkeh zbivanji. Tu nedefiniranu situaciju iskoristil je talijanski pjesnik i pustolov Gabrielle D’Annunzio ki je na krileh frustriranega i nezadovoljnega talijanskega naroda krenul osvojit Reku z svojun paravojskun, z svojmi „arditi“ kako su se prozvali. Ča je namislel, to je i storil, i to 12.9.1919. Ovaj događaj je va povijeste poznat kako „Marcia di Ronchi“ i to zato aš je D’Anunnzio ganul s talijanskega gradića Ronchi (blizu Monfalcona). Na 40 kamioni nakrcalo se je 278 arditi, a sam D’Anunnzio je krenul va črjenen Fiate 501 spreda seh. Još je jedna zanimljivost vezana uz Matulji i samega D’Anunnzia: na put su krenuli po noće, a negder okol 11 jutro kolona se je fermala na Kuke od kuda je D’Anunnzio prvi put ugledal Reku na ku je krenul.
Tu su malo predahnuli, čekali da se cela kolona priključi i onda su si skupa krenuli v Reku ka ih je oduševljeno dočekala, pa su istega dana i preuzeli vlast i proglasili Reku za talijanski grad. D’Anunnzio je vladal z Rekun malo više od leto dan. Način na ki je vladal i kako je organizirana samoproglašena država ku su nazvali „Reggenza Italiana del Carnaro” zapravo su začetak fašističkega pokreta, a sam D’Anunnzio dobil je naziv Duce kega će mu nekoliko let kašneje prezet njegov učenik, puno poznateji Benito Mussolini.
Rapalski sporazum potpisan je 19.11.1920. Po ten sporazume su utvrđene granice zmej dve državi, a povučene su na očiglednu vojničku, ekonomsku i političku korist Italije. Osim Trsta, Gorice, Gradiški i dela Kranjske, Italije je pripala i Istra (bez općini Kastav). Italiji su priključeni i otoki Cres i Lošinj skupa z nekim manjemi otoki, te otoki Lastovo i Palagruža . Od Reki je stvorena nezavisna država ka obuhvaća grad Reku, rečki kotar i manji del Istri na zapade rečkog kotara, tako da Kraljevina Italija ima direktnu kopnenu vezu z novun Rečkun državun. D’Anunnzio ni priznal Rapalski sporazum pa je Italija bojeć se zapadneh savezniki odlučila na silu oslobodit Reku od arditi i pomoć da se proglasi i formira Slobodna država Reka. To je i provedeno na Božić 1920. leta i taj događaj je ostal zapisan va povjeste kako “Krvavi Božić”.
Nakon tega uspostavljena je Rapalska granica ka je za preko 20 let podelila naš kraj. Iako je na graničneh stupeh stavno leto 1920. sama granica je bila praktično utvrđena 1921. leta i to od strane komisije va koj su bili: za jugoslavensku stran pukovnik Danilo Kalafatović kot predsjednik, a kot člani pukovnik Milan Ječmenić I kapetan fregati Viktor Klobučar. Talijansku stran zastupali su senator Quartieri, direktor trgovačke floti Gullini i pukovnik Carletti. Komisija je prvi sastanak održala 3.5.1921. v Opatije, a već 28.5.1921. je granica bila sa senjana i povučena. Ostalo je zapisano da je talijanska stran bila jako tolerantna I da je va sporneh situacijah ona bila ta ka je popušćala. Nakon tega, ista komisija utvrdila je granicu mej “Slobodnun državun Rijeka” i Italijun ka je šla od Rubeš kade je i danas kraj cesti zbaćen Cippo principale pa ravno prema Preluku do zapadnega ruba kavi kade je i dan danas (po mane nepravedna) granica Reki i Opatije. Treba reć da iako postavljena i z kamenemi stupi obilježena ova granica ni va prakse nikad saživela, aš je Reka samo na harte figurirala kot slobodna država, a u stvari je bila po sen del talijanske državi.
Pa kuda je pasevala ta famozna “Rapalska” granica? Danas to moremo utvrdit na nekoliko načini, a najlagji je da pratimo istočnu katastarsku granicu Općini Matulji. Isto tako, Talijani su granicu i saki granični stup na njoj ucrtali jako precizno, a za sreću je se to dobro očuvano va Državnen arhive, za razliku od stupići na terene ki su va jako veliken dele unišćeni. Del su judi iskoristili na razno razni načini po svojeh umejkeh, a del je namjerno i (čak) organizirano unišćen potla rata kada su omladinci revoltirani ča je ona uopće postojala šli z bati razbijat.
Naš “obilazak” počet ćemo na tromeđe Matuj, Kastva i Opatije, a to je jušto zgora raskršća kade se skreće z zaobilaznice prema Matujan, odnosno prema tunelu Učka i Pule. Desno od tega raskršća pa proti sjeveru pasevala je granica ka je prihajala z smjera Reki, a samo da napomenemo da ona pasuje mej zaobilaznicu i cestu Zamet – Kastav. Kroz polje prihaja do cesti Frlanija – Rubeši i pul zadnjeh frlanskeh kuć seče cestu i gre po postojećen pute prema Rubešon. Spod Svetega Mihovila ki je pripal Italije storen je kot da bi jedan “klin”. Pretpostavlja se da je granica tako postavljena pofin strateškeh razlogi kako bi Talijani mogli na oke imet cestu ka gre s Kastva preko Rubeš v Reku. Tamo je granica pasevala posred dolca čigov del je i danaska va vlasništve familije Dinkota Kukurina ki je del stupići i sačuval. “Za buduće genarecije” je rekal i na ten mu je trebe čestitat i zahvalit se. Tamo je granica zavila oštro zgorun i šla uz Sveti Mihovil proti Perasovu s ten da su Antončići ostali na talijanskoj strane, a Tometići na jugoslavenskoj. Na Perasove granica prihaja po postojećoj cestice va zavoj spod restorana “Nero” i nastavlja se po sporednoj cestice prema Popovićen. Na pol puta do Tišjarići (to je zgora butigi “Lid”) gre desno va šumicu i nakon 300 metar prihaja sjeverno od Popović na cestu.
Mej kućami prihaja opet na cestu Bermač – Trinajstići i to okol 50 metar zgora raskršća. Po ceste gre okol 150 metar prema Trinajstićen i onda skreće levo i prihaja do auto-puta prema Rupe. Auto-put i njegova izgradnja prouzročili su uništavanje dela graničneh stupići, a del zdola Radetići je ostal očuvan. Kade je danas podvožnjak na ceste Šmogori – Trinajstići bil je granični prelaz, a granica je šla prema sjeveru mej Vlahov breg i Miseri. Na ceste Jušići – Kastav isto je bil prelaz, a onda granica nastavlja kroz šumu Lužinu proti Majevemu vrhu i daje na Mačkov vrh, pa spod Brezu proti Klane i dalje kroz Sloveniju prema Austrije. Pokojni gospodin Vjekoslav Frlan s Kastva dal si je velega truda pak je zapisal položaj I storil opis sakega objekta (od stupića preko stražarnic do karauli) vezanega uz ovu granicu i to od Miseri do Klani.
Granica je bila podijeljena na “sektori”, a ovo naše područje bilo je “sector 26”. On je bil podeljen na 3 deli
-26/a “Trestenico”(Trstenik) z sjedišten va Ilirskoj Bistrice
-26/b “Bresa”(Breza) z sjedištem va Klane
-26/c “Mattuglie”(Matulji) z sjedištem pul Mućić
Rapalsku granicu na talijanskoj strane su čuvali gafovci, financi i fašisti, a na jugoslovenskoj graničari i cariniki.
Gafovci su bili pripadniki Pogranične straže GAF (Guardia alla Frontiera). Gafovci su ostali lokalnemu stanovništvu va sjećanje po alpskeh uniformah z klobukon na ki je bilo zataknjeno pero. Glavni moto po ken su bili poznati je bil: “Dei Sacri Confini Guardia Sicura” – Na sveteh granicah sigurna straža.
Uz granicu su storeni brojni objekti, kazermi za GAF, za finance i za vojsku, kontrolne kućice i stražarnice. Danas je del uništen, a del služi za neke druge svrhi, od stambeneh do privredneh. Na našen područje dosta vela kazerma GAF-a je bila pul Brajan. Danas su ostali samo fundamenti i ostatki nekeh pratećeh objekti.
Duž cele granice su se postavjali stupići. Talijani su ih zvali cippo.
Delimo ih na:
1.Cippo principale
2.Cippo secondario
3.Cippo speciale
Cippo principale: Visina mu je 97 cm, temelji se na kvadratoj osnove stranice 40 cm, vertikalni rubi su odrezani va širine od 5 cm i postavjen je na fundament od betona.
Cippo secondario: Obični granični stupićii Rapalske granice su visoki 60 cm,pravokutne su osnovi z stranicami 22 x 18 cm,vertikalni rubi su odrezani va širine 4 cm,a postavjeni su z dužun stranicun va smjere granice.Fundament njin je betonski,veličine 50 x 50 cm.
Na talijanskoj strane imaju urezano i izvorno črjeno popiturano slovo I,pod njom je vodoravna riga,a pod njun je leto 1920.
Jednako je i na jugoslovenskoj strane,samo je tamo velo slovo J.
Najprej je bila na ten meste kratica SHS,aš se je država najprej zvala Kraljevina Srba,Hrvata i Slovenaca; ali je od 03.10 1929. službeni naziv državi Srba,Hrvata i Slovenaca bil Kraljevina Jugoslavija.
Va smjere granice, obe strani su jednako označene i nose brojčanu oznaku;na vrhe je arapski broj,ki označava broj sektora,pod njin je rimski broj ki označava broj tega graničnoga stupa.
Na vrhe sakega graničnega stupa postoje tri orijentacijske rigi: z sredini su urezane dve rigi ke pokažuju smjer proti susednen graničnen stupon (prethodni I sledeći). Z iste točke je urezana i treća riga popiturana va črjeno ka pokažuje smjer sjevera.
Cippo speciale su bili granični kamiki veliki kako I cippo principale, ali nisu bili stožastega nego kvadratnega oblika. Postavljani su na graničneh prelazeh va pare, saki z jedne strani cesti. Zanimljivo je da su va celoj Hrvatskoj kuda je pasevala Rapalska granica, očuvani ostali još samo dva stupa I to južno od Brezi na danas zapušćenoj ceste proti Jelušićen.
Prema Rimskemu sporazumu ki je potpisan 27. jenara 1924. mej Kraljevinun Italijun i Kraljevinun SHS revidiran je Rapalski sporazum i zapravo je samo formalizirano postojeće stanje. Rijeka kako slobodna država je i formalno prestala postojat i postala je i službeno del Kraljevine Italije. Po ten sporazume neznatno je korigirana postojeća granica z 1920.-tega leta pa je tako cesta Kastav – Reka cela pripala Kraljevine SHS, a š njun i područja sjeverno od naselji Tometići, Brgudi (današnji Bivio) i Drenovi kako i celo naselje Pehlin, dokla su sama ta naselja (Tometići, Brgudi I Drenova) uključujući i kompletan tok Rečine pripali Italije. Tega leta postavlja se od Rubeš do Porto Baroša ukupno 585 stupići ki su za razliku od oneh z 1920.-tega leta bili klesani. Granica je bila podeljena na VIII sektori i saki stupić je imel uklesan rimski broj sektora i arapski broj ki je po rede.
Prema nacrton ki postoje i ki su jako precizni i detaljani, ali i z obilaskon same granice da se zaključit da je granica vavek tekla po granice posjeda, znači da se juden nikad ni pojedina katastarska čestica sekla, a ča se je (va propagandne svrhi) znalo govorit. Istina je da je bilo dosta slučaji da su judi ostali bivat na jednoj strane granice, a umejki, lehi I šumi va drugoj pak su imeli dosta okapanja na granice. Ja, danaska kada gremo od Matuj proti Kastvu po budi ken pute teško nan je i zamislet da pred 80 let judi nisu mogli ovuda slobodno pasevat. Provajte se spametit ovega kad bute šli proti Kastvu.
ZONA FRANCA
Va letah kada je formirana Rapalska granica svet je drmala vela ekonomska kriza. Moramo znat da su naši kraji za Italiju kot državu bili samo periferija i to teška periferija ma koliko got zgledalo da njin je do našega kraja stalo. To su leta kada rečka industrija drastično propada, a š njun i radna mesta. Područje naše općini još je vavek ruralno područje i većina judi žive od zemji i malo blaga ko se plasira v Opatiju koj je isto “zlatno austrijsko doba” odzvonilo zavavek. Takovo stanje pridonosilo je velemu nezadovoljstvu naroda ki se preko svojeh predstavniki buni. Normalno, va okvireh mogućnosti koliko se je moglo za vreme fašizma bunit i koliko su ti “predstavniki” stvarno predstavjali narod. Da bi se postojeće stanje koliko-toliko ublažilo za područje Kvarnerske pokrajine (tal. Provincia del Carnaro) proglašena je 18.3.1930. bescarinska zona (tal. Zona franca del Carnaro). Va sastave pokrajini bili su Rijeka, Opatija z Volosken, Ičići, Ika, Lovran, Medveja, Mošćenička Draga, Matulji, Klana i Ilirska Bistrica. Razlog uvođenja bescarinske zoni bil je pokušaj da se unapredi turizam i tako stekne prednost pred konkurenti, va prven rede crikveničke i vinodolske rivijeri. Sledeće leto, 24.9.1931. leta uveden je va Italije porez na promet za benzinu ki je iznosil 15%, a Kvarnerska pokrajina je bila tega oslobođena ča je vjerovatno i jedan od razlogi da se je va nešeh krajeh jako razvil promet i povećal broj motorneh vozili.
Niske cijeni benzini i ostale robi široke potrošnji imeli su i onu drugu stran medaji, a to je da su judi počeli švercat. Šverc ili kuntrabant kako su to onda zvali postal je skoro pa način živjenja, a nekemu bome i preživjavanja. Važno je napomenut da su va područje ¨zoni france¨ ča se područja naše općini tiče bili samo dosta usko područje okol naselja Matulji. Sjeverno od njih više ni bila ¨zona franca¨ pak su Talijani morali postavit čuda punkti na keh su njihi financi kontrolirali prelazak judi i robi. I dan danas se je zadržal toponim “Dugana”, a to je na ceste prema Jušićen mej “Tibo” (al nekadajni Mikron) i Mihelići, a najveća kuća pul Frančić se i dan danas zove “kazerma”, magari su finaci ki su va njoj bivali odselili pred 70 let.
Jenu štoriju ka nan more onako z prve ruki povedet kako su to neki judi iskoristili zonu francu i bimo rekli “su se snašli i profitali”, magari su njin drugovi potla drugega rata to jako zamerali i provali njin zet ono ča su s poštenen delon i po ondašnjeh zakoneh zaslužili, povedel nan je Josip Ćiković od Mihotić, čigov nono je “storil bradu” baš za to vreme zoni france.
Josip Ivanić, Jože, kako su ga zvali rodon z sela Ivanići oženil se je za jenu z Lipićevega roda i šli su bivat na Zvoneću kade je Jože, trgovac po struke, otprl butigu ka je delala onako, toliko da. Kada se je otprla “zona franca¨ Jožetu su predložili da ča ne bi on, kot jedan dobar trgovac otprl jenu butigu va toj ¨zone france¨. Trebe reć da su i Lipićevi od kuda mu j’ žena bila isto va to vreme otprli butigu pul Šmogori i posal njin je lepo krenul. Jože je prišal Mihotićen, ča ni ni čudno aš pul Matuj su već si prostori bili zauzeti. Va kuće od pokojnega duhtora Jankota Mavrovića otprl je butigu, a kraj butigi je afital i mići kvarter va ken su bivali. Posal je krenul, i to jako dobro. Blizu kući va koj su bivali kupuje staru Mikulovu kuću, a va vrteh te iste kući počel je delat novu, to se zna, velu kuću z poslovnemi prostori. Va gornjen dele je uz stambeni prostor bila peknjica, a dole je bila bekarija (mesnica) od pokojnega Stankota ka je bila va funkcije do sredine 70.-teh let pasanega stoleća, Jožetova butiga od jezbini (va koj je danas Josipov “Jadran suvenir”) i butiga od robi (textila bimo rekli danaska). Na drugu stran cesti (va Ivulovoj kuće) je bil krojač i trafika kade se je tabak prodaval. Pravi trgovački centar. Posal je cval. Jože je kupil i motor s prikolicun s ken se je kruh raspejeval okole. Šofer i prodavačica ka je na hrpte još imela i koš s kruhon. A najveći posal se je delal kada je ki od Matuj, Frančić al Bregi umrl. Inšoma, kega se je moralo zakopat va Rukavac. Cimiter pul Matuj storen je kašneje, komać 1935. leta. Talijani, kakovi got su bili jako su poštovali ceremoniju sprogoda i pravilo je bilo da se bez obzira na ¨zonu francu¨ sprogod ne sme fermat i kontrolirat. Dapače, još su financi i soldati stali mirno i salutirali pokojnemu ki got da je bil. Bimo rekli da je sprogodu granica bila otprta po sen sega. Judi kot judi su iskoistili situaciju pak su brzo tekli Mihotićen va butigu se neč kupit. Najviše cukar i kafe, ma kupovalo se je i druge stvari ke danas zovemo ¨roba široke potrošnje¨. To se je zavuklo pod robu, po zime lagje, pod prošiveni kapoti i se je skupa s pokojnen nosilo prek kunfina. Dogajale su se i smešne situaciji, aš je kakovoj starice ku ni nijedan poznal stran par sused i bliže rodbini na sprogod prišlo i par stotin judi. Se gore od Rukavca preko Zvoneće do Mun i Žejan. Prej sprogoda da j’ bila fila pred butigun i nekoliko desetak metar.
Ovo je samo jedna od štorij ke pomalo padaju va zaborav. Prah vremena ih pokriva, a danaska je malo mladeh judi keh je voja ta prah raspuhat i videt ča i kako je onput bilo.
Teško ćete danaska nać mladega čoveka ki će znat ča j’ to kamene na ken pišu nekakovi broji i slova. Particeli uz rapalski kunfin su se prodale. Kupili su jih judi ken to kamene niš ne znači. Neki su ga razbili, neki su ga porabili za neč ča njin se je činilo korisneje, a neki su ih (saka njin čast) i sačuvali. Ma kako i ti prišlići, ni naši judi nisu bili niš boji. Isto su ih razbijali, neki su ih porabili za škalini storit, a neki su ih očuvali. Neka primjer budu gosp. Dinko Kukurin ki ih je očuval i svoji vnuki vadi ča je to i gosp. Vito Hrvatin ki je pul Popović nagovoril svoji susedi da ne razbiju jedan od zadnjeh graničneh kamiki pul Popović. Nemojte ih ni vi razbijat. Slikajte ih i dece pokažite kot uspomenu na jedno vreme ko neka se nikada više maj ne ponovi.